İranın daxili işlər nazirini qəbul edən Prezident İlham Əliyev ikitərəfli əlaqələrin genişləndirilməsinin önəmini qeyd edib

• İranın daxili işlər nazirini qəbul edən Prezident İlham Əliyev ikitərəfli əlaqələrin genişləndirilməsinin önəmini qeyd edib

Azərbaycan Respublikasının Prezidenti İlham Əliyev İran İslam Respublikasının daxili işlər naziri İsgəndər Mömini ilə görüşündə Tehran və Bakı arasında müxtəlif sahələrdə, xüsusilə təhlükəsizlik və ictimai asayişin qorunması sahəsində əməkdaşlığın davam etdirilməsinin vacibliyini vurğulayaraq, İran Daxili İşlər Nazirliyi nümayəndə heyətinin ölkəmizə səfərinin uğurlu keçəcəyinə ümidvar olduğunu bildirmişdir.

İlham Əliyev görüş zamanı iki ölkə arasında bütün istiqamətlərdə, xüsusilə də təhlükəsizlik və ictimai asayişin təmin olunması sahəsində yüksək səviyyəli əməkdaşlığın qorunub saxlanılmasının önəmini qeyd etmişdir.

Azərbaycan Respublikasının Prezidenti İran Daxili İşlər Nazirliyi nümayəndə heyətinin səfərinin uğurlu keçəcəyinə əminliyini ifadə edərək, bu səfəri iki ölkə arasında ikitərəfli əlaqələrin və qarşılıqlı məsləhətləşmələrin davam etdirilməsi istiqamətində mühüm addım kimi qiymətləndirmişdir. O, həmçinin Azərbaycan nümayəndə heyətinin İrana son səfərinə və bu çərçivədə baş tutmuş mühüm görüşlərə toxunmuşdur.

İsgəndər Mömini də öz növbəsində səmimi qəbul və qonaqpərvərliyə görə Prezident Əliyevə minnətdarlığını bildirərək, dost və qardaş Azərbaycan Respublikasında səfərdə olmasından məmnunluq duyduğunu vurğulamışdır.

İran İslam Respublikasının daxili işlər naziri İran Prezidenti Məsud Pezeşkianın səmimi salamlarını İlham Əliyevə çatdırmışdır. İlham Əliyev diqqətə görə təşəkkür etmiş və İranın daxili işlər nazirindən öz qarşılıqlı salamlarını Məsud Pezeşkiana çatdırmağı xahiş etmişdir.

Azərbaycan Respublikasının Prezidenti, həmçinin son dövrlərdə İran Prezidenti ilə dəfələrlə görüşdüyünü xatırladaraq, bir neçə gün əvvəl Türkmənistanda baş tutmuş görüşlərini məmnuniyyətlə qeyd etmişdir. İranın daxili işlər naziri isə öz növbəsində bildirmişdir ki, İran Prezidenti iki ölkənin müvafiq qurumları arasındakı əlaqələrin hərtərəfli inkişafına xüsusi önəm verir.

Cənab Mömini İran ilə Azərbaycan Respublikası arasındakı qardaşlıq və dostluq münasibətlərinə toxunaraq, güclü zəlzələlər və meşə yanğınları başda olmaqla, müxtəlif fövqəladə hallar zamanı Azərbaycan Respublikasının İrana göstərdiyi humanitar yardımları və dəstəyi bir daha yüksək qiymətləndirmişdir.

İranın daxili işlər naziri, həmçinin Azərbaycan Prezidentini regional gərginliyin azaldılması istiqamətində aparılan danışıqlar prosesi barədə məlumatlandırmışdır.

İlham Əliyev də öz növbəsində Yaxın Şərq regionundakı mövcud gərginliklərin danışıqlar yolu ilə tənzimlənəcəyinə ümidvar olduğunu bildirmişdir. Görüşdə tərəflər, həmçinin iki ölkənin aidiyyəti qurumları arasındakı əməkdaşlıq perspektivləri və qarşılıqlı maraq doğuran digər məsələlər ətrafında geniş fikir mübadiləsi aparmışlar.

Daxili işlər naziri azərbaycanlı həmkarının rəsmi dəvəti ilə Bakıya səfər etmişdir.

Daxili işlər naziri cənab Möminin bu səfəri çərçivəsində daxili işlər naziri Vilayət Eyvazov və Azərbaycan Respublikasının digər rəsmi şəxsləri ilə görüşüb danışıqlar aparması nəzərdə tutulmuşdur.