İran İslam Respublikasının İƏT Turizm Nazirlərinin 7-ci İclasında iştirakı

İran İslam Respublikasının İƏT Turizm Nazirlərinin 7-ci İclasında iştirakı

İqtisadi Əməkdaşlıq Təşkilatının (İƏT) Turizm Nazirlərinin 7-ci iclası, 29 aprel 2026-cı il tarixində üzv ölkələrin nümayəndə heyətlərinin iştirakı ilə Azərbaycan Respublikasının Şuşa şəhərində keçirilmişdir.

İran İslam Respublikasının Azərbaycan Respublikasındakı səfiri Müctəba Dəmirçilu sammitdəki çıxışında turizmin üzv dövlətlər arasında münasibətlərin inkişafındakı rolunu vurğulayaraq, turizm vizalarının sadələşdirilməsi və sağlamlıq turizminin (tibb turizmi) inkişaf etdirilməsi istiqamətində təkliflər irəli sürmüşdür.

Səfir öz çıxışında, aralarında YUNESKO-nun Ümumdünya İrs Siyahısına daxil edilmiş 5 İran abidəsinin də olduğu, ümumilikdə 149 tarixi-mədəniyyət abidəsinə, qədim məkanlara və muzeylərə dəymiş zərərlərə diqqət çəkmişdir. Bu zərərlərin bəzi hallarda bərpaolunmaz dərəcədə ağır olduğunu qeyd edən diplomat, sözügedən dağıntıları bəşəriyyətə qarşı cinayət və ortaq bəşəri irsə təcavüzün bariz nümunəsi kimi qiymətləndirmiş, beynəlxalq birliyi bu məsələyə kəskin reaksiya verməyə çağırmışdır.

İclasın gedişatında Şuşa şəhərinin "2026-cı il üçün İƏT-in Turizm Paytaxtı" elan edilməsinə dair sənəd imzalanmış və sammitin yekun sənədi olan "Şuşa Bəyannaməsi" qəbul edilmişdir. Bu bəyannamədə iştirakçılar turizmi regional inteqrasiyanın gücləndirilməsi vasitəsi kimi qeyd edərək, bu sahədə birgə əməkdaşlığın genişləndirilməsini vurğulayıblar.

Bundan əlavə, İran nümayəndə heyətinin ABŞ və sionist rejimin hərbi təcavüzləri nəticəsində ölkənin tarixi abidələrinə və turizm infrastrukturuna dəymiş ziyan barədə hesabatı əsasında, mədəni irsin toxunulmazlığının qorunması və tarixi məkanlara qarşı hücumların qarşısının alınmasının zəruriliyi xüsusi vurğulanıb.