Daxili işlər naziri azərbaycanlı həmkarı ilə görüşündə İran - Azərbaycan arasında təhlükəsizlik və sərhəd sahəsində əməkdaşlıq daha da genişləndirilir Bakıya səfər edən İranın daxili işlər naziri iki ölkə arasında qarşılıqlı əlaqələrin və koordinasiyanın gücləndirilməsinin vacibliyini vurğulayaraq, təhlükəsizlik və sərhəd sahəsində əməkdaşlığın inkişaf etdirilməsini, mütəşəkkil cinayətkarlıq və narkotik vasitələrə qarşı mübarizəni, eləcə də miqrasiya və gediş-gəlişlə bağlı məsələlərin tənzimlənməsini ikitərəfli danışıqların əsas prioritetləri kimi qiymətləndirmişdir. İsgəndər Mömini Azərbaycan Respublikasının daxili işlər naziri Vilayət Eyvazovun rəsmi qarşılanma mərasimi ilə Bakıya daxil oldu. Səfərin əvvəlində İran İslam Respublikası ilə Azərbaycan Respublikası arasındakı münasibətlərin qədim köklərə və sıx qohumluq-dostluq bağlarına malik olduğunu vurğulayan nazir bildirmişdir: "İki ölkənin zəngin mədəni, dini və tarixi ortaq cəhətləri mövcuddur, həmçinin uzun quru sərhədlərimiz var; İran İslam Respublikasının xarici siyasətinin əsas təməlini qonşuluq münasibətlərinə, habelə qonşu dövlətlərə və regiona verilən xüsusi önəm təşkil edir." Azərbaycan Respublikası daxili işlər nazirinin rəsmi dəvəti ilə bu ölkəyə səfər edən Cənab Mömini əlavə etmişdir: "Qonşu dövlətlərlə əlaqələrin inkişafı İran İslam Respublikasının xarici siyasətinin başlıca prioritetlərindəndir və Azərbaycan Respublikası da İranın xarici siyasətində xüsusi mövqeyə malikdir. Təbii ki, bu səfər zamanı təhlükəsizlik məsələləri, sərhədlərdən gediş-gəliş, mütəşəkkil cinayətkarlıqla mübarizə, miqrasiya və narkotiklərin qanunsuz dövriyyəsinə qarşı tədbirlər gündəliyin əsas mövzularındandır." İki ölkə arasındakı əlaqələrin yüksək səviyyədə olduğunu qeyd edən nazir bildirmişdir: "Sərhədlərin etibarlı təhlükəsizliyi məhz sərhədin hər iki tərəfində yerləşən ölkələrin sıx təması, qarşılıqlı əməkdaşlığı və əlaqələndirilmiş fəaliyyətindən birbaşa asılıdır." Nazir qeyd etmişdir ki, ikitərəfli, o cümlədən təhlükəsizlik və sərhəd münasibətlərinin daha da dərinləşdirilməsi məqsədilə Azərbaycan Respublikasının daxili işlər naziri, fövqəladə hallar naziri və digər rəsmi şəxslərlə görüşlərin keçirilməsi nəzərdə tutulmuşdur. Səfər zamanı daxili işlər nazirini ölkənin Böhranların İdarə Olunması Təşkilatının sədri cənab Səcediniya, Ərdəbil əyalətinin valisi cənab İmami Yeqane, Gilan əyalətinin valisi cənab Haqqşünas, parlamentin Milli təhlükəsizlik və xarici siyasət komissiyasının üzvü cənab Rzazadə, nazirin müşaviri və İnformasiya Mərkəzinin rəhbəri cənab Xacenejad, həmçinin Daxili İşlər Nazirliyinin Beynəlxalq əlaqələr şöbəsinin müdiri və nazirin müşaviri cənab Cavahiri müşayiət edirlər.